أهم الأسئلة المطروحة في مقابلة المنح


بهذا المقال أستعرض أهم الأسئلة المطروحة في مقابلة المنح :

 أول شي مظهرك : لباس نضيف وأنيق ..... رسمي مافي مشكلة , عطر خفيف , إذا كان جديد البسه ولو مرة قبل المقابلة واطلع فيه مشوار منشان يروح هي الهالة تبع التياب الجديدة الي ممكن تغطي ع طاقتك الشخصية بالمقابلة

تاني شي : أول نظرة كتيرررررررررر مهمة , بتحط عينك بعين الشخص الي عم يقابلك وبتسلم بالإيد و ما تكون إيدك رخوة تعطي فكرة إنك ضعيف شخصية ولا قوية تزعجه بسلامك 
 الأفضل وسط تعطي شعور بالثقة وخاصة مع نظرة عين مباشرة وابتسامة لطيفة 

لمن بتقعد , لا تركي حالك لورا منشان ما تعطي صفة مغرور ولا تلف رجل ع رجل ولا تحني ضهرك لقدام تعطي صفة خجول .. قدر المستطاع طبيعي وعفوي 

خلصنا من المظاهر والي عفكرة كتيرررررر مهمة , بنجي للجوهر 

أهم نقطة : يتطابق جوابك بالمقابلة مع الي كاتبوا بالسيفي و برسالة الدافع , أي تناقض بيعطي فكرة إنك كذاب و بتنرفض للمنحة 

أجوبتك لازم تكون قصيرة و واضحة وقاطعة 

رح يسألوك بعض الاسئلة الكلاسيكية متل : 

- شو رح تعمل بعد المنحة ؟
 حسب شو كاتب برسالة الدافع , إذا كاتب بدك ترجع تعمر بلدك , قول هيك وإذا كاتب إنه بدك تعمل تعليمك وتاخد دكتوراه قول هيك وهكذا 

- ليش بتعتبر حالك مؤهل لهلمنحة؟

هون فيك تقول جملة بطريقة مازحة وفورا تضحك بعدها : لإني الأفضل ... بعدين بتبلش بالأجوبة المعروفة إنه الي بميزك بشكل خاص إنك طموح وسريع التعلم و بلا بلا بلا 

- ليش اخترت هالفرع و ليش هالجامعة ؟
 لازم تحضر كم جملة عن هالموضوع .... ثقف نفسك مليح عنها بس كمان ما تقعد تحكيلهم قصص تاريخية مملة .. جواب قصير وحتى أفضل جواب إنه صديق إلك درس فيها وحكالك كذا وكذا 

- ليش هالبلد ؟
 اقرأ معلومات شوي عن وضع التعليم بهلبلد وقصص عامة عنه و فيك تذكر قصة صغيرة بسيطة عن هالبلد كتير سبيشال ومميزة فيه ..... مثلا قصة نهوض ألمانيا بعد االحرب ... هالقصة كتير كتير بيعتزوا فيه 

- كيف سمعت عن هي المنحة ؟
 بشرفكم حكوا عني هههه .. فيكم تقولوا عن طريق الانترنت أو أي معلومة تكونوا ذاكرينها برسالة الدافع , عن طريق صديق ... أهم شي عدم التناقض بين الي رح تحكوه وبين المذكور بأوراقكم

- كيف رح تخدمك هي المنحة بتأمين مستقبلك ؟
 ممكن تحكوا عن الوضع المالي و السفر والمستوى التعليمي العالي بالبلد تبع المنحة 

- وين رح تشوف حالك بعد عشر سنين؟
 بالمنح يفضل يكون جوابكم أكاديمي ... إنه مثلا تدريس جامعة , نقل خبراتي ل جيل ما بعد الحرب ... حابب صير برفسور ما غلط ... الخ

انتبه ما ترتكب كتير أخطاء باللغة لإنه المقابلة فيها شي من الفحص الحقيقي لمستوى لغتك ويتأكدوا من الي ادعيته بإنه لغتك بمستوى معين 

مافيهاأي شي تطلب منهم يعيدوا السؤال ببطء بس ما تخلي هالشي يتكرر لأكتر من سؤال , سؤال واحد إذا طلبت هالشي مافي مشكلة ويفضل طبعا إنه تفهم عليهم كل الأسئلة وأوقات حتى لو ما كتير فهمت جرب جاوب و هني لحالهم رح يقولولك لا لا ما هاد الي قصدناه بل هاد 

- ممكن يكون في سؤال استفزازي ليشوفوا ردة فعلك .. أفضل شي تبتسم و تقلهم متأكدين إنه مسموح تسألوا هالسؤال وعكلن تكرم عينكم رح جاوب .. هيك بتعطيهم فكرة إنك شخص بيعرف واجباته وبيعرف حقوفه ومانه سهل بس لطيف ومتجاوب 
 لا تعصب ولا تعيط قد ما تكون متوتر وقد ما يكون السؤال استفزازي لإنه بالأخير هاد الاختبار الحقيقي لشخصيتك 

سؤال : إنه شو ممكن يصير فيك إذا ما حصلت على هي المنحة ؟
 ببساطة إنك شخص واقعي ورح تتقبل النتيجة شو ما كانت ورح تقدم على غير منح أو رح تشتغل وتكمل تعليمك .. حسسهم إنه العلم مهم كتير إلك 

ممكن سؤال عن إنه إذا انت شخص قادر يتعامل مع ضغوطات الامتحان أو الغربة ؟
 بكل بساطة بتشرحلهم بشكل مختصر عن الي واجهته بسوريا ومع هيك نجحت بتخطيه وكملت مشوارك العلمي 

لاااااااااااا تحكي كتير سياسة .. الأجانب ما بحبوا وبخافوا من السياسة ... هني ما جايين يختبروا قدراتك السياسية التحليلية هني بدهم يشوفوا شوي من إنسانيتك وبس 

وأهم شي طوال الوقت بالمحادثة حط عيونك بعيونهم وحافظ ع ابتسامة مشرقة وتنقل من شخص لشخص باللجنة وإنت عم تحكي .. لا تركز بس ع واحد أو وحدة وتنسى الباقيين .. لا تحط راسك بالأرض وكإنك عم تسّمع نشيد ولا بالسقف وكإنه في فيل طاير 

لا تدمع عيونك ... ما تخليهم يقبلوك شفقة بل يخليهم يقبلوك لإنك السوري الي رافع راسه عطول :)

بالتوفيق لإلكم يا جيل شباب سوريا الرائع