الحصول على الجنسية الألمانية



كيفية الحصول على الجنسية الألمانية : 

 بظن هاد الموضوع بيهم كتير من الناس الي إجوا عألمانيا وهدفهم الاستقرار بحياتهم .. الحلو إنه الجنسية السورية ما بتسقط عنا , يعني بنحصل على شي اسمه دوال سيتزينشيب , يعني بنحتفظ بالجواز السوري والجواز الألماني

الجواز الألماني تم تصنيفه كأقوى جواز سفر بالعالم لعام 20166 , بيتيحلكم السفر على 179 دولة دون فيزا مع سهولة الحصول على فيزا لبقية دول العالم 
المصدر : 

http://news.travelerpedia.net/reports-statistics/تقرير-أقوى-جوازات-السفر-لعام-2016/

طبعا هاد الجواز الحلم بده شروط لازم يحققها الشخص المتقدم ليحصل عليه
 أول شي لازم تعرفوه إنه موظف أو موظفة الإقامة بألمانيا معه صلاحيات بتبلش من إنه يطبق القانون بحرفيته ليعطي استثناءات لكتير حالات مانها مطبقة ولا شرط .... لكن رح نحكي هون عن القانون الأساسي للحصول على الجنسية الألمانية أما الحالات الخاصة الي بنسمع عنها بالاشاعات فما فينا نعتبرها قانون ونمشي عليه
شروط الجنسية بألمانيا , لنفترض طالب بألمانيا درس واشتغل :
- الشخص المتقدم لازم يكون صرله 88 سنين بألمانيا ع الأقل ومعه إقامة دائمة (دائمة يعني غير محدودة .... ما 3 سنين أو 5 سنين) و إلها شروط ببقى بشرحها ببوست مستقل
 - ما عليه أي مشكلة قانونية أو جرم أو مساءلة أو تهرب من الضرايب أو أي التزام مع محاكم الدولة
 - عنده عقد عمل أو مصدر رزق خاص (يعني شغل خاص) , ما عم ياخد أي أموال من الجوب سينتر أو رعاية اجتماعية و عم يدفع ضرائب بشكل نظامي للدولة الألمانية
- مستوى ألماني B1 (شهادة حصرا من غوتة أو تيلك )
 - ماله أي علاقة مع أي منظمة إرهابية , ما بصير يدعمها سواء بالقول أو الفعل أو التمويل ( أي اثبات للشخص بدعم هيك منظمات حتى لو تعليق ع الفيسبوك فبيتم محاسبته و رفض طلبه للجنسية )
- شهادة نجاح بفحص الاندماج Leben in Deutschland
الأوراق المطلوبة :
 طبعا بتختلف من متقدم لآخر وخلال موعدك مع موظفة الجنسية بتشرحلك شو الأوراق الي بدها ياها منك .. بس في أوراق رئيسية هيي نفسها لجميع المتقدمين
- الإقامة الدائمة بألمانيا
- جواز سفرك لجنسيتك القديمة صالح لمدة ع الأقل 66 أشهر أو وثيقة سفر ألمانية للاجئين
- شهادة ميلاد مترجمة ومصدقة من بلدك 
- صورة عن عقد العمل (أو أي ورقة تثبت مصدر رزقك)
- كشف راتب شهري (بيكفي آخر شهر)
- للمتزوجين : صورة عن عقد الزواج و طبعا وثائق عن الأطفال
- كشف عن أجار البيت (آخر مرة دفعت أجارك بتطبع ورقة البنك)
-شهادة نجاح بفحص اللغة B1 
- شهادة نجاح بفحص الاندماج Leben in Deutschland 
- سيرة ذاتية Lebenslauf or CV
- صور عن شهاداتك الجامعية بألمانيا
هلأ لنفترض شخص حب يقدم بعد 77 سنين من وجوده بألمانيا : بيقدر يقدم بس بده يحضر دورة اندماج مدتها 5 أشهر, كل يوم 5 ساعات + مستوى لغة ألمانية B2 وعادة هيك فرصة بيقدموها سواء 6 أو 7 سنين للأشخاص الأكاديمين الي أثبتوا كفاءة علمية خاصة بألمانيا أو منصبهم بالشركة مميز وألمانيا بحاجة لخبراتهم
 هلأ اللاجئ ما بحقله يقدم لحتى يكون خالص من راتب الجوب سينتر ع الأقل آخر 3 سنين .. يعني لو فرضنا لاجئ صرله 8 سنين بألمانيا ومعه لغة بس لساته عم ياخد مصاري من الجوب سينتر فهاد ما بحقله ياخد جنسية .... ع الأقل لازم آخر 3 سنين يكون عم يشتغل ويدفع ضرايب , حتى في خطر إنه اللاجئين بعد 3 سنين إقامة إذا ما أثبتوا وجودهن بألمانيا وبلشوا شغل إنه إقامتهم نفسها ما تتجدد أو تتعركس وتتمدد سنة ورا سنة مع كتير من المساءلات القانونية
الي بيتزوج ألمانية أو ألماني , فبيقدر يقدم بعد 33 سنين من إقامته بألمانيا ع الجنسية (سنتين منهم متزوج ) مع الحفاظ ع بقية الشروط من ناحية اتقان اللغة ودورة الاندماج و النجاح بفحص اللغة وفحص الاندماج
الأطفال : أي طفل لأم أو أب ألماني , تلقائيا بياخد الجنسية
المصدر لكل هالحكي : 
https://www.sachsen.de/en/1444.htm

نصيحة آخيرة:
 اخلصوا من راتب الجوب سينتر بأسرع وقت ممكن , لاقوا مهنة خاصة فيكم , شو ما كانت رح تجبلكم دخل أفضل من راتب الجوب سينتر و رح تعزز وضعكم بألمانيا و ادفعوا ضرائب ..
لا تشتغلوا بالأسود أبددددددددااااااااا ... هي مانها سوريا 
عند الأجانب في قاعدة عامة : لا تمزح مع مديرية الضرايب
 هي فيها تقليع من البلد من دون أي مبالغة وسحب إقامة .... ادفع الضريبة وانت مبتسم لإنه كل هالجمال الي انت فيه من تنظيم شوارع وخدمات هيي منك وإلك ... أنا كنت ادفع 40% من راتبي ضرايب بس بحياتي ما اشتكيت بعد ما أدركت إنه هالضرايب عم تخلي ألمانيا قوية و مميزة و أنا بحب هالبلد ولازم ساهم فيه ولو من راتبي .....
بتمنالكن كل التوفيق بحياتكن