كيفية الحصول على فيزا دراسية إلي ألمانيا


إنت طالب وحابب تجيب قبول من جامعة ألمانية عحسابك شو لازم تعمل ؟

رح اشرح بهالبوست الطريقة الي أنا اتبعتها من 6 سنين مع شوية أبديت كونه في قصص جديدة صارت 

أول شي بتجهز الأوراق الكلاسيكية والي هي : 
- السيرة الذاتية علطريقة الألمانية (أول صفحة صورة شخصية بطقم رسمي وتحتها اسمك وعنوانك وبعدها صفحتي سيرة ذاتية كلاسيكية)
- رسالة الدافع , الموتفيشين 
- شهادة التخرج من الجامعة
- كشف علامات كل السنوات 
- شهادة الثانوي 
- شهادة اللغة .. ممكن قبول معهد لغة (خاص بالبرامج الألمانية وليس الانكليزية ) يستعيض عنها بس شخصيا بنصح بتحصيل أكبر عدد من مستويات اللغة خارج ألمانيا لسببين : 
الأول , ضمان الفيزا وعدم القلق من الرفض 
التاني : التكلفة الهائلة للمعيشة في ألمانيا ودوراتها 
-في حال الامكانية : رسائل توصية من دكاترة جامعتك 

كل شي اسمه شهادة لازم يكون مترجم ومصدق من الخارجية , رسائل التوصية بكفي يكونوا مترجمين عند ترجمان محلف أو تطلب من دكتورك يكتبلك ياها بالانكليزي فورا و يريحك 

أوراقك جاهزين ومعمولين كلهم بصيغة pdf ع الكمبيوتر ؟ 
بتنزل برنامج بيجمعهم ويعملهم ملف بي دي اف واحد 

هلأ صرت جاهز .. يعني جحا وأهله موافقين ع العروس فقطعوا نص الطريق هههههه 

بنرجع للجد .. إنت جاهز , لازم تكون بالمانيا أصلا جامعة بتقدم اختصاص الي عم تدور عليه ... وهلشي كتير سهل تلاقيه ... ببساطة بتفوت على هاد الرابط وبتتسلى بعملية البحث , بتختار الدرجة الي عم تدور عليها , اللغة الي حابب تدرس فيها , اختصاصك و بتكبس enter

www.study-in.de

أو من هاد الرابط 

https://www.daad.de/deutschland/studienangebote/international-programs/en/

بعد ما تحط الكلمات المفتاحية للبحث بيطلعلك روابط كل البرامج الي تطابقت مع أسئلتك 

بتبلش تفتحهم رابط رابط و بتقرأ عنالبرنامج , في أزرار بتطلع من فوق زرقا مكتوب عليها شو الأوراق المطلوبة وشو المواد الي بتدرس بهاد البرنامج 
وبعدين بتفتح شي اسمه funding ,بتشوف شو تكلفة هلبرنامج , إذا لحد ال 500 يورو بالفصل فهاد حكومي ورخيص .. خاصة جماعة الاقتصاد والفنون لازم ينتبهوا ما يسجلوا بجامعات خاصة اجورها واوا بتوصل ل 10 آلاف يورو بالفصل 
بس 90 بالمية من البرامج بهاد الرابط حكومية ومجانية 
بعدين شفت كل النتائج وعجبك برنامج منهم ., بتفوت على قسم الاتصال بالجامعة
contact 
بتشوف شو الطريقة الي بيحبوا إنك تراسلهم فيهم .. أونلاين , بتمسك هالملف البي دي اف الي فيه كل أوراقك وبترسله لايميل الجامعة مع كلمتين ظراف تحكي فيهم ليش عم ترسل هالايميل للجماعة 
أو بدهم تقدم عن طريق البريد فببساطة بترسل أوراقك بالدي اتش ال لعنوانهم 

وفي عن جديد بعض الجامعات عم تطلب التقديم لإلها عن طريق شي اسمه uni-assist 
السبب إنه بالفترة الأخيرة : أنظار الطلاب توجهت لألمانيا وصاروا كتير طلاب حول العالم يقدموا لألمانيا والجامعات معاد تعرف مين الطالب وشوى مستوى جامعته الي تخرج منها فصارت تطلب التقديم لإلها عن طريق هالمنظمة الي مهتمها التأكد من مصداقية أوراق الطالب ومستوى جامعته 
هي موقعها : www.uni-assist.de 
بتقدم أوراقك لعندها بشكل مباشر ومابدك وسيط 

وبتقدم ع أكتر من برنامج منشان تضمن قبول ... حقك تقدم على مية , ما حدا اله عندك شي وتختار بعدين الي بيعجبك 

وبتستنى ... هلأ اجاك قبول , بتزغلط شوي وبتعمل حفلة بعدين بتبلش المرحلة التانيةوالي هي رحلتك مع الفيزا الألمانية 

أهم شي تفتح حساب بنكي أو يكون عندك حدا يكفلك بألمانيا 

الحساب البنكي : راجع المقال المخصص لكيفية فتح حساب بنكي في ألمانيا 

الكفيل: ابن الحلال الي بده يكفلك بتقله يروح مع كشف راتبه لمكتب الاقامة بالمدينة الي هوي فيها ويقلهم أنا بدي اكفل فلان الفلاني يا جماعة , موظفة الاقامة بتطلع ع راتبه وبتعطيه ورقة يعبيها وبتختمها وهو بس يبعتلك ياها بالدي اتش ال 

السفارة : هلأ صار معك , ورقة قبول جامعي و ورقة بنك (بعد ماحولت المصاري عليه) أو ورقة كفيل ... بتضيف عليهم أوراقك وشهاداتك المترجمة والمصدقة 
وبتاخد موعد من السفارة وبتعبي طلب فيزا طالب و بتقدم كل شي للسفارة 

ملاحظة : مسموح إلك تشتغل بألمانيا مدة 120 يوم بدوام كامل يعني 8 ساعات يوميا بالسنة أو 240 يوم بدوام نصفي يعني 4 ساعات يوميا ... العمل ضمن الجامعة غير محدود و راتبك بس تجاوز ال 8500 يورو سنويا بتبلش تدفع ضرائب و بتسترجعها لمن تعمل شي اسمه تصريح ضريبي بتعمله بنهاية السنة وبترجعلك هي الضرائب مرة تانية