كيفية عمل بريزنتيشين مميز

Search

Tags


هاد البوست هو شرح عن طريقتي الخاصة بعمل بريزنتيشين علمي بشكل احترافي بس طبعا كل شخص وإله روحه وطريقته بهالموضوع , فما شرط تتبعوا الطريقة نفسها 

بالبداية رح احكي عن نقاط رئيسية ضروري الالتزام فيها قبل ما نحكي عن التفاصيل وترتيب السلايدات بالتفصيل :

- أول شي بفكر فيه قبل ما بلش اعمل المحاضرة : 
 إنه مين الجمهور المتابع ... لإنه إذا كان البريزنتيشين بمؤتمر فيه ناس من اختصاصات مختلفة فلازم يكون بإسلوب ومستوى مختلف عن إذا كان بين مجموعة أشخاص محترفين بإختصاصك وفهمانين مليح فيه 

- تاني شي وهاد كتير كتير كتير مهم : الوقت 
 لازم تعرفوا قديش معكم وقت للبريزنتيشين و تتركوا كم دقيقة بالأخير لأسئلة الجمهور , لإنه الشخص الي داخل ع المحاضرة بيكون برمج عقله إنه رح يتابع بريزنتيشين مدته 15 دقيقة , بالتالي إذا إنت عملت بريزنتيشين 20 دقيقة فالناس رح تبلش تتململ بآخر 5 دقايق ويكرهوك بكل معنى الكلمة , عدا عن إنك رح تخربط كل برنامج الجلسة بالكونفيرس و ما رح تترك وقت للأسئلة 

كيف بتنظم الوقت : هالشي بيعتمد ع سرعتك بالإلقاء .. بس وسطيا لازم يكون السلايد مدته دقيقة ل دقيقة ونص حسب أهميته وحجم المعلومات الي فيه .. هون التدريب مع تعيير الساعة كتير كتير مهم , شي 3 مرات بكفي و بتعير موبايلك وبتراقب سرعتك 

- لباسك الرسمي مهم لإنه بدل ع احترامك لمستوى الحدث , ممنوع تحطوا إيدكم بجيبتكم أثناء المحاضرة لإنه بتعطي استهتار بالجمهور وفيها غرور مزعج لكتير ناس 

- استخدام الصورو الفيديوهات : هي نقاط قوة بالبريزنتيشين , خففوا كتابات بالبريزنتيشين بحيث ما يتجاوز سطرين بالسلايد لإنه بصير ممل , الأمور المرئية متل الصور والفيديوهات بتنحفظ بذاكرة المراقب أكتر من الكلام المكتوب 
 هون ضروري كمان إذكر , إنه أي صورة بتجيبوها من الانترنت لازم تحطوا تحت الصورة بالسلايد : مصدر الصورة , هي بتعطي فكرة عن أمانتك و احترامك لحقوق النشر 

- استخدم نفس ال font ( نوع الخط ) مثلا
 Arial أو Times New Roman
بكل السلايدات , ما بصير تغير الفونت بكل سلايد لإنه بيعطي فكرة إنك غير احترافي 

- كبر الخط , خاصة حجم الأرقام الموجودة ع الصور والاشارات العلمية ... بتكبرهم منشان الناس الي قاعدة بآخر مقعد تقدر تقرأ الأرقام متل مطال الاشارة .... والأهم تعرض خطوط الإشارات , يعني استخدم خط عريض مو رفيع , استخدم ألوان قوية , بعد عن الألوان الفاتحة الي سبحان الله ع البيمر (جهاز الاسقاط) بتختفي وبتنمحى ... استخدم الأسود والأحمر والأزرق ... بعد عن الأصفر والفوسفوري و الزهري ... 

- حط أرقام للسلايدات أسفل كل سلايد , هاد بفيد إذا شخص بده يسألك عن سلايد معين , بيسجل رقمه وبآخر المحاضرة بقلك عندي سؤال بالسلايد رقم كذا 

- جهز سلايدات إضافية , هي ما بتعرضها بإلقاءك للمحاضرة , هي بتخليها في حال شخص سألك سؤال معين و حابة تجاوبه بتفصيل أكتر عن سؤاله فبتكون مجهز سلايد بعد آخر سلايد يكون فيه شرح تفصيلي ... هاد يعني إنك بعد ماتخلص بريزنتيشين تبعك , لازم تتخيل إنه شو ممكن ينطرح عليك أسئلة وتجهز حالك للإجابة إما شفهيا أو بسلايد إضافي متل ما شرحت 

- راجع وبدقة أي خطأ إملائي ... مابصير يكون فيه خطأ إملائي لإنه بيعطي فكرة إنك مستهتر وغير دقيق 

- تأكدوا قبل دوركم بالمحاضرة من إنه بريزنتيشين تبعكم رح يشتغل بقاعة المحاضرة , تأكدوا من الفيديوهات إنها تشتغل و إنه ما رح تتعرضوا لأي مشكلة تقنية 

- أبدعوا : أطلقوا العنان لخيالكم , لا تخجلوا ... لاقوا صور أو مخططات بيانية بسيطة توصل فكرتكم وبعدوا عن التعقيد .. مثال : لمن ستيف جوبز حب يشرح إنه جهاز الأبل رفيع , بكل بساطة عرض صورة مغلف مغلق وقلهم فيكم تحطوا فيه اللابتوب ... ما حط صورة اللابتوب مع مسطرة و أرقام و عقد الجمهور

آخر شي : أنا شخصيا اشتريت جهاز كونترول بغير بين السلايدات عحسابي وباخدوا معي ع كل مؤتمر منشان ما اتعرض لإحراج إنه كل جهاز كونترول بيكون شكل و متل مابصير عادة مع كل المحاضرين , بيخربطوا بين زر الليزر و زر التنقل بين السلايدات وبين اليمين واليسار و بظهر عليهم التلبك 

رح نحكي هلأ عن البريزنتيشين لمجموعة متنوعة من الأشخاص الي ما عندهم نفس الاختصاص أو مختلفين عنك بالمجال العلمي , كيف ترتب سلايداتك 

- أول شي لازم تتخيل إنه الي قدامك طفل ماعنده أي فكرة عن مجالك وبالتالي بدك تحط حالك محله و تفكر بالطريقة الأمثل لتوصله فكرتك .... لازم تتخيل قصة مشوقة تخلي المشاهدين ينشدوا للمتابعة من أول سلايد .... بالتالي السلايد الأول لازم يكون اسمه : الدافع 
 ليش إنت موضوعك مهم وليش الجمهور لازم يتابعوا هالمحاضرة .... يفضل ينحكى مثال من الواقع لإنه الناس صعب تستوعب دافع غير مرتبط بواقعها اليومي

تاني شي لازم تعطي فكرة عامة عن تاريخ موضوعك , مثال بسيط : الألياف البصرية من نوع
 hollow core fiber
و كيف استوحوها من تشكيلة العين لأحد الحشرات ... هون الجمهور بيبلش يستمتع ويحس حاله عم يتابع ناشيونال غرافيك :D 
 و بتعطي كمان فكرة عن الأبحاث الحالية الي عم تجري بنفس مجالك وشو إنت رح تضيف عليها أو شو بتختلف عنها 

تالت شي : شرح عن جهاز تجربتك بدقة مع صور (يفضل يكون عندك صور 3 دي ) إما حقيقية لمخبرك أو تخلي فنان يصمملك صورة مميزة عن تجربتك ببرامج إحترافية 

رابع شي : النظري , هون بتحط سلايد صعب فيه معادلات لحتى العالم تعرف إنك عامل شي علمي صعب + ضروري تشرح شو النظري الي استخدمته بنتائجك 

خامسا: بتشرح عن اجراءات التجربة , يعني بتخلي المشاهد يحس حاله معك جوا المخبر وعم يشتغل معك , بقليل من التفصيل 

سادسا : نتائجك ... هون بيكون أكتر من سلايدين عن نتائج تجربتك 

سابعا: بتحكي عن الاستنتاجات من هالنتائج , بيكون متل ملخص عن شو لازم الشخص يستنتج من تجربتك 

آخر سلايد بتشكر فيه المشاهدين و بتقلهم إنك صرت جاهز للأسئلة 

هيك أي شخص حتى لو مابيعرف شي عن موضوعك فعلى الأقل رح ياخد فكرة عامة عن شغلك 

هلأ إذا بدكم تقدموا بريزنتيشين قدام ناس احترافيين , فلازم تختصروا المقدمة التاريخية و تكبروا النتائج و تعطوا تفاصيل علمية دقيقة عن شغلكم ونتائجكم لإنهم ناس اختصاصين ومتجاوزين الأمور البسيطة .. لازم محاضرتكم تغنيهم بالمعرفة مو بس تعطي فكرة عامة عن شغلكم 

وتذكروا دائما إنه إضافة مزحة بين كل كم سلايد , كتير كتيرررررر مهمة لحتى الحضور يضحك وينتعش و يرجع يركز معكم و يتابعكم بشغف ... وتذكروا إنه الناس بتنسى البريزنتيشين مع الأيام وبتتذكر الانطباع الي خلفتوه وراكم بعد محاضرتكم ... رح يتذكروا استمتاعهم وضحكتهم وينسوا الكلام العلمي الممل 

هي ملاحظاتي وانشالله كون قدرت فيد حدا منكم