كيف تكتب ايميل بطريقة إحترافية إلى برفسور

Search


هاد المقال بيشرح عن الطريقة المثلى لمراسلة برفسور بحيث تخليه ع الأقل يرد على ايميلك , سواء كان طلبك ليشرف عليك بالدكتوراه أو لتعمل عنده ريسيرتش كم شهر 

أول شي لازم تعرفوا إنه إذا بدكم ياه يعطيكم ريسيرتش عحسابه فهاد أمر كتيرررر صعب بس مانه مستحيل أما إذا معكم المنحة أو عحسابكم أو في جهة ممولة لإلكم فرح يكون الموضوع أسهل بكتير ومع ذلك إذا كان أسلوب كتابتكم للإيميل خاطئة فممكن ببساطة يروح إيميلكم لسلة المهملات بكمبيوتر البرفسور 

أول نقطة لازم ما ترسل الايميل بفترة الأعياد يعني من نص كانون الأول ل نص كانون الثاني ولا بفترة العطلة الصيفية من نص تموز لنص آيلول لإنه ببساطة مخه للبرفسور بالعطلة وآخر شي رح يعمله يرد ع ايميلك 
لا تبعته إثنين أوجمعة (ممكن بعض البرفسورية بفضلوا الجمعة أو الويكيند ليقرأوا ايميلاتهم بس هي مو قاعدة عامة )الأفضل نشتغل ع السليم ... ابعتوه الأربعا , الخميس لإنهم أوقات عمل نظامي 

ببداية الايميل بتكتب
Dear Prof.
مع الكنية من دون الاسم الأول وما في داعي تحط اللقب كامل يعني
Prof.Dr.habil ....etc
 خلص بكفي اللقب الأعلى وهو البرفسورية 

تاني شي بتبلش فورا تعرف عن نفسك , اسمك, بلدك , دراستك الجامعية , اختصاصك, مشروع تخرجك إذا كان كتير قريب لموضوع بحثه للبرفسور نفسه 

تالت شي وهي من أهم النقط ,منين سمعت عن هاد البرفسور وليش اخترته إله بالذات(مثلا اختصاصه القريب من شغلك أو موادك العلمية) وهلشي كتير ضروري منشان تحمله مسؤولية ويحس إنك مختاره إله بالذات مو ايميل بنموذج جاهزو عم تبتعه لأي برفسور 

رابع شي بتشرح بلطف طلبك , ولازم ومهم جدا تفهمه التمويل من مين رح يكون 

خامس شي : ممكن كسوري تكتب جملة إنه هي المنحة وفرصة قبوله لإلك رح تأنقذ حياتك من جحيم الحرب ... ما تنذله وما تتوسله , بس عبارة بسيطة تحمله مسؤولية بالرد عليك 

سادس شي : بتتشكره ع وقته الثمين وبتطلب منه يرد عليك بغض النظر إذا الرد إيجابي أو لأ 
وبتخبره إنك مرفق مع الايميل سيرتك الذاتية وممكن كمان شهاداتك 
إذا أرسلت شهاداتك مع السيفي فبتحطهم كلهم بملف واحد بي دي اف , ما يتجاوز ال 5 ميغا 

صورة السيفي خليها تعطي ثقة و ود 

ملاحظة : ممكن تستخدم ولو جملة فيها ظرافة , مثلا أنا مرة كتبت لبرفسور إنه بالمناسبة اسمي معناه عطر الورد و إيه : أنا بنت 
لإنه عادة الأجانب ما بيعرفوا من أسمائنا شو جنسنا .... ومرة كتبت إنه حبيت صورهم بالجروب وهالشي عطاني رغبة بالانضمام لإلهم 
يعني هيك بتلفت نظره إنك شخص كتير منفتح ومهضوم وبنفس الوقت من كتابتك عن دراستك إنك شخص قوي علمياً وبالنسبة لأي برفسور حول العالم حاليا ما بدهم غير طالب نشيط وذكي ومنفتح غير معقد ومنغلق 

بس هيك .. أنا متأكدة 100 بالمية إنه إذا اتبعتوا هالخطوات بدقة رح يجيكم رد ,ممكن سلبي بس المهم يجيكم فييد باك من البرفسور وتعرفه رأيه 

بالأخير بدي نبه إنه خلي جملك قصيرة وقوية لا تحكيله قصة حياتك ولا تنسى إنه هدول الأشخاص الي عم تراسلوهم كتييييييييرررررررر مشغولين (هي شغلة أنا ما كنت  استوعبها لمن كنت بسوريا) بس صدقا كتير مشغولين ويكتر خيرهم إنهم عم يقرأوا ايميلاتنا 
بتمناالكم التوفيق من كل قلبي 


بالتوفيق يارب