Research Proposal ريسيرتش بروبوسال


  Research Proposal 
رح احكي بهاد البوست عن الريسيرتش بروبوسال

يمكن كلمة بروبوسال سمعانينها بأفلام هوليوود وعادة بتجي بمعنى شب طلب ايد حبيبته للزواج وهي يا بتقول إيه يا بتقول لأ , هون نفس الشي بس حضرتك بتكون طالب إيد قصدي مصاري من المنظمة لتدعم فكرتك العلمية الي حابب تعمل فيها دكتوراه أو بحث علمي بعد الدكتوراه أو مشروع علمي توظف فيه عالم و المنظمة يا بتقول إيه يا بتقول لأ 

مين بيحتاج هيك ورقة : 

1) إنت طالب خلصت ماستر وعندك فكرة حلوي كتير ... طلعت فيها خلال الماستر و حابب تنفذها ع أرض الواقع ... فشو بتعمل ؟ 
 بتدور أول شي على برفسور يشرف عليك لإنه أكيد لوحدك مارح تعرف تمشي بهالطريق ويمكن يكون نفسه الي أشرف على إطروحتك الماستر
 بعدين بتسأله للبرفسور إذا عنده مصاري فغالبا بيتدلل وبقلك إنه لأ ما عنده بس انه موافق يشرف عليك بس حضرتك مسؤول تأمن المصاري
 من عند المنظمات الداعمة للباحثين العلميين , مثلا بألمانيا منظمة دي اف جي
DFG
هي بتشبه DAAD 
بس أكثر اختصاصا بطلاب الدكتوراه ... بتفوت على موقعهم و بتشوف الطلب و بتبلش تعبيه والي عادة بيكون مؤلف من كم نقطة رح اشرحهم تباعا 

2) دكتور جامعة أو برفسور وعنده كتير أفكار علمية جديدة بس بده تمويل ليوظف طلاب دكتوراه فيها ....

3) عادة ما بتنطلب هيك ورقة من المنح الكلاسيكية الي أصلا عندها فكرة يعني جامعة معينة طارحة فكرة دكتوراه وإنت رحت قدمت عليها فهون ما بيطلبوا ريسيرتش بروبوسال لإنه أصلا الفكرة معروفة بس البعض منهم بيتفزلك وبيطلبوها , ليقدروا يميزوا المتقدمين ومين الي فهمان ومتعمق بفكرة الدكتوراه أكتر وبهيك حالة بيكونوا شارحين شو بدك تكتب فيها وكم صفحة وكل التفاصيل و بتمشي حضرتك على الإرشادات تبعيتهم بالحرف بس عادة بتتبع النقاط الرئيسية للريسيرتش بروبوسال 

أول شي هي عبارة عن ملف صغير من 3 ل 4 صفحات مو أكتر ولا أقل 

أول صفحة ( Title page)

 بيكون فيها معلوماتك الشخصية : اسمك , لقبك الأكاديمي (ماستر بالعلوم , دبلوما ,دكتور, برفسور ) , موقعك العلمي الحالي (طالب , باحث علمي , رئيس قسم ... الخ) , مواليدك , جنسيتك , عنوانك البريدي والتلفون وعنوان مكتبك وعنوان قسمك 

بعد قسم االمعلومات الشخصية بنجي لشي مهم جدا جدا : عنوان بحثك العلمي .... أهم شي انسى العناوين العربية الرنانة الطنانة تبع عابر سرير و فوضى الحواس وغيرها , اسم البحث لازم يوصف بدقة موضوع الدكتوراه , موضوعي , منطقي, قصير مو أكتر من 10 كلمات , ممل , بس هيك بيكون صح 

فيك تستعين بمشرفك لاختيار الاسم إذا صعب عليك 

ثم بتذكر أسماء البرفسورية المشرفين عليك , إذا كنت رئيس قسم بتذكر أسماء كل الموظفين بقسمك مع ألقابهم الأكاديمية طبعا 

بعدبن بنفوت بمضمون الريسيرتش بروبوسال 

بتبلش بشي اسمه
 introduction
مقدمة : هون بتعطي مقدمة عن مشروعك وموتفيشين ليش هالمشروع مهم للبشرية وشو المشاكل العلمية الي رح تسعى لحلها كهدف نهائي لمشروعك

بعدين فقرة اسمها
State of Art أو Previous work 

هي الفقرة مهمة لإنها بتعطي فكرة للجنة إنه حضرتك ما عمتلعب وعرفان وين الله حاطك وبتعرف الي قبلك شو مشتغلين بهالموضوع و شو العيوب الي ماقدروا يتجاوزوها وإنت عندك حل متميز عنهم أو إنت عندك ببساطة مشاركة بسيطة علمية لهلمجال مختلفة عن أقرانك من الباحثين حابب تشارك البشرية فيها 
 وهون بتتوسع مليح وبتحط مراجع قد ما فيك عن كل الطرق و الأبحاث الي انعملت بهالمجال وكل ما توسعت . كل ما حستك اللجنة جدي وفعلا هالزلمي عارف طريقه 
 وإذا إنت كنت أولريدي بالش بهالفكرة بالماستر مثلا وعندك مقالة علمية فيها فكمان ضيفها بشرحك بهي الفقرة واحكي عن شغلك بهالمجال وأرفق مقالتك كمرجع مهم لتقييمك 

بعدين فقرة اسمها
Objective and work program 

أول شي بتحدد الفترة الزمنية الي طالب فيها مصاري لهلمشروع 3 سنين أو 6 أو أو و قديش الفترة الزمنية المطلوب من هالمنظمة تدعم مشروعك ماليا 

بعدين أوبجيكتيف : 
وهي معناها أهدافك : تك تك تك ... يعني أنا ناوي بها 3 سنين أنجز مايلي بإختصار وبخطوط عريضة توضح شو هي المشاكل العلمية الي رح تحلها خلال مشروعك 

الخطة الزمنية : هي تحديد تفصيلي لزمن انجازك للمشروع وبتختلف عن النقطة الي قبلها بإنه هون بتذكر مثلا بالسنة الأولى رح أنجز كذا وكذا 
السنة الثانية كذا وكذا .. وهكذا 
 هي النقطة كمان كتيرررررررررررر مهمة لإنها بتعطيهم فكرة و وعد رسمي منك بإنك رح تلتزم بهالأهداف بهالمدة ... آخر شي بدها ياه المنظمة إنه تصرف مصرياتها ع فاشل بيضيع الوقت أو ببيعهم كلام وما بيلتزم بكلامه ويسرق مصرياتهم لهيك أغلب هيك نوع من التمويل بكون دائما لنصف المدة المطلوبة بعدين بتجي لجنة تحكيم وبتشوف شو نفذت حضرتك من النقاط الي كتبتها بهاد الريسيرتش بروبوسال وإذا شافوك ماشي نظامي بتابعوا تمويلهم لإلك 
شافوك غير ملتزم ببساطة بوقفوا التمويل 

بعدين فقرة بتحكي عن ال
 required budget
الميزانية المتوقعة للمشروع والمطلوب من المنظمةتمويلها : قديش المبلغ التقديري المطلوب , رواتب لإلك وإذا كنت مدير مشروع للأعضاء الي رح توظفهم , تكلفة مواد لوجستية , يعني قديش تقريبا بدك تكاليف للمخبر من أجهزة ومواد , تكاليف سفر ومؤتمرات وغيرها من المصاريف
 وهون بدك تكون حكيم .. لا تحط أرقام خيالية تخليهم يختاروا غيرك ولا تحط أرقام قليلة تطلع خسران ... كون واقعي و اعمل حساباتك بتجرد وبحبحهم شوي لإنه ما ممكن تتخيل شو بيطلعلك مفاجآت بالمخبر ... إسألني أنا :)

بعدين إذا عندك مشاريع قديمة ممولتها نفس المنظمة وناجحة فإذكرها منشان تدعم موقفك , اكتب كل شي ممكن يدعم طلبك من نجاحك السابق وغيره 

بشكل عام هي أهم النقاط بالريسيرتش بروبوسال بشكل عام , بس كل منظمة ممكن تخربط الترتيب , تزيد تفصيل صغير أو تنقص تفصيل بس أنا هون متل ماقلت سابقا شرحت الخطوط العامة ...

بالتوفيق يارب :)

ملاحظة : كل بلد بيكون فيها منظمة مسؤولة عن تمويل البحث العلمي , اسألوا عنها .. تاني شي اتعاونوا مع مشرفكم لكتابتها لإنه بيكون عنده خبرة أكتر منكم فيه