رسالة التوصية



: رسالة التوصية
 أي طالب حاليا موجود بجامعته سارع لطلب رسائل توصية من دكاترتك أحسن ما يصير معك متل ماعم بصير بالطلاب الي تخرجوا وفقدوا أي تواصل مع دكاترتهم السابقين 

هلأ بما إنه دكاترتنا ما عندهم وقت و مشغولين فغالبا عم يطلبوا من الطالب يكتبها وهني يوقعوها 
 رغم اعتراضي الشددددددددديد ع هيك موضوع لإنه عنجد لازم الدكتور يكتبها بنفسه بس شر لابد منه , مضطرة راعي ظروفكم ... لهيك أيها الطالب السوري المعذب والي مضطر تكتب حتى رسالة توصية بنفسك فشوف النقاط الي لازم تراعيها :

صفات رسالة التوصية ع المستوى العالمي : 

1- يفضل تكون مكتوبة على ورقة جامعة رسمية ع الكمبيوتر (اسأل سكرتيرة القسم) , يعني عليها لوغو و اسم الجامعة (في بعض المنح أوالجامعات بيكون شرط ضروري مو بس يفضل) ع الزاوية اليسارية أواليمينية وع الزاوية المقابلة ينكتب اسم الدكتور وعنوانه البريدي و الايميل و رقم الهاتف و تاريخ كتابة هالتوصية _ضروري ذكر التاريخ_ 
 لازم يكتب عنوانه الجديد الي بتقدر إدارة المنحة تتواصل معه عليها , ويفضل ايميل الجامعة الرسمي مو ايميل جيميل أوهوتميل
 - إدارة المنحة رح تجرب أولا وأخيرا تتواصل مع الدكتور عن طريق الايميل (هي الطريقة المنظقية للتواصل الرسمي حول العالم) لهيك نبهوا دكاترتكم لهلموضوع و نبهوا إدارة المنحة على ظرف الانترنت بالبلد واطلبوا منهم يتصلوا هاتفيا مع الدكتور في حال ما استجاب لإيميلهم 

2- لازم وضروري يذكر الدكتور من وين بيعرفك وقديش المدة الي عرفك فيها و يذكر شوية تفاصيل تحسس القارئ إنه عنجد إنت متميز لحتى بيتذكرك مو من ورا ايده كتبها 

3- لازم يختمها الدكتور بإسمه و توقيعه (قلم حبر يعني أصلية ) 

4- لازم يكتب كم كلمة حلوين عنك وعن تميزك مقارنة مع باقي زملائك 

5- لازم يبدأها بعبارة كلاسيكية : To Whom It May Concern, 

6- إذا المنحة طالبة توصية خاصة بمنحتهم , لازم يكون برسالة التوصية عبارة مكتوب فيها إنه أنا الدكتور الفلاني برشح الطالب الفلاني بشدة لهي المنحة لإنه برأيي بيستحقها (بهالسياق هاد )

بعض المنح بتطلب من الدكتور يحمل بنفسه الرسالة ع موقعهم منشان ع أساس إنه الطالب ما بيعرف شو مكتوب فيها هههههه , المهم هالطلب محرج شوي , بس ضيفه لدكتورك بقلاوة و قله منشان الله اخدمني هالخدمة
 إذا طلع حظك قليل ومابحب البقلاوة , سلم بنفسك إدارة المنحة رسالة التوصية وقلهم الدكتور عنده ظرف .. بيضل أحسن من بلا 

ملاحظة :
 بالنسبة للطلاب الي خارج سوريا , بظن الأمل مو منتهي , جربوا تلاقوا شي أخ صديق الكم بالجامعة وعن طريقه توصلوا مع دكتوركم القديم بس خبروه وين درسكم وبأي سنة وبأي مادة