فحص ال GRE



فحص الـ GRE بيتكون من 3 أجزاء: جزء متعلق بالرياضيات والتحليل المنطقي وسرعة البديهة، وجزء بيتعلق بالمهارات اللغوية باستثناء الكتابة
وجزء خاص بالكتابة

بالنسبة لأوربا إذا كانت الجامعة طالبة GRE فالمقصود هو جزء الرياضيات على الأغلب، ولكن ما فيك إلا تقدم الاختبارات الثلاثة، 
الاختبارين الأول والثاني علامة كل واحد فيهن 8000 واختبار الكتابة علامتو 6.

غالباً بيطلبوا أنو تكون علامة الشخص بالاختبار العلمي فوق 600 أما بأمريكا فعلى الأغلب بيطلبوا مجموع الفحصين الأول والثاني فوق 1000 أو 1100 أو حسب الجامعة وبيطلبوا حد أدنى بفحص الكتابة.
 الفحص العلمي مانو صعب كمستوى يعني مستوى رياضيات بكالوريا علمي ولكن الفحص بيعتمد على سرعة البديهة والتفكير المنطقي والوصول للحل بأسرع طريقة ممكنة وغالباً بدون الاعتماد على القوانين الرياضية والمعادلات لأنو بتاخد وقت أكبر والأسئلة كلها خيارات متعددة يعن يالجواب موجود بس بدك تحددو (مو شغلة بسيطة على طول) بس غالباً بشوية تدريب ممكن يجيب الواحد نتيجة كتير منيحة،

أما بالنسبة للجزء التاني اللي كمان علامتو 800 فهو فعلاً صعب جداً لغير الناطقين بالانكليزي لأنو على سبيل المثال بأحد اجزاء الفحص بيعطوك زوج كلمات في بيناتهن علاقة معينة وبيعطوك خمس أزواج بدك تختار أفضل زوج بيرتبط ببعضو بطريقة مشابهة للزوج اللي بالسؤال، بجزء تاني بيعطوك كلمة وبدك تعطيهن عكسها بالمعنى هلأ الظاهر انو سهل ولكنه صعب جداً أنو من بين 6 - 10 كلمات غالباً بتكون نادرة الاستخدام أو كلمات عامية بدها محترف أو قاموس لتلاقيها وغالباً مانك سمعان فيها بحياتك (عم أحكي على شخص عادي) حتى لو كان معك فحص توفل أوآيلتس لذلك هاد الجزء بدو تدريب كبير

الجزء التالت كتابي وعلامتو من 6 .. غالباً موضوعين واحد بيطرح مشكلة وكيف حلوها وأنت بتناقش إيجابيات وسلبيات الحل والتاني بيطرح مشكلة وأنت بدك تطرح الحل من وجهة نظرك وتذكر إيجابياتو وسلبياتو.. يعني هاد الفحص بيعتمد على شغلتين المحاكمة العقلية للأمور ومهارتك اللغوية في التعبير عنو، اللي بيسجب على الفحص بيعطوه إمكانية يجرب نفسو بأحد المواضيع الكتابية طبعاً ويبعت الجواب الإيميل وبعرضو الجواب على لجنة بتشبه اللجنة اللي بدها تضلح الفحص الحقيقي وبيردو عليه وبيعطوه علامة وتقرير أنو وين أخطأ و وين أصاب وشو نقاط الضعف بالموضوع تبعو، وفي على ما أظن إمكانية لأنو ياخد مواضيع اكتر ولكن بتصير بمصاري 

التسجيل عبر الانترنت حصراً وكان بعام 2010 بيكلف حوالي 200 دولار، وبعد التسجيل بيعطو الشخص اسم حساب وكلمة مرور بالموقع تبعهن وبيصير منو ممكن يشوف تمارين تجريبية ويتابع حالة الفحص، يمكن الفحص بيصير مرتين بالسنة بس وبدو تسجيل قبل فترة

بسورية كان الفحص بالمركز الثقافي الامريكي، في فحوص مماثلة ولكن إلها علاقة بإدارة الأعمال والاقتصاد وهيك شغلات وفي مجموعة من الفحوص تابعة لنفس المؤسسة اللي بتعمل GRE شي بالقانون وشي بالمعلوماتية فالشخص اللي بدو يقدم على أمريكا لازم يعرف الجامعة بالضبط شو طالبة ولكن حسب معلوماتي أغلبية الجامعات بتطلب فحص GRE اللي حكينا عنو

رابط كتير مهم فيه مواد مفيدة للنجاح بالفحص من الصديق محمد الشوقي :
https://drive.google.com/folderview?id=0B7pHmA0_3jXRNE5kTVVxRmh3UW8&usp=drive_web

بالتوفيق للجميع