كيف تكتب رسالة الدافع


 طبعاً كل إنسان وعنده روحه بالكتابة أكيد بس في خطوط عريضة لازم نلتزم فيها منشان ما نخرج عن الإطار العام للبروفيشينال 
 
1- الكتابة مالازم تتجاوز صفحتين , صفحة ونص بزيادة

2- لا تستخدم ألوان ,فقط الأسود من مبدأ الرسمية و الأسود يليق بك :)
.. استعمل خطوط رسمية متل
 arial , Roman timess
 والفونت حوالي 11- 12 مو أكتر 
 وأكيد أكيد لا تستخدموا سطور تحت الجمل أو اشارات تعجب أو أي بولد للكلمة أو اشارة استفهام أو اي شي استفزازي غير رسمي

3- على يسار الصفحة من الأعلى حط عنوانك الحالي واترك فراغ وبعدين حط تاريخ كامل ليوم كتابتك الرسالة مثلا 06/09/2014
 بنهاية الرسالة حط اسمك ووقع بخط أزرق و ارسلها بالبريد أو اعملها سكان بعد ما توقع وابعتها بالايميل 

4- بداية الرسالة متل الإيميل :
Dear Madam/Sir,
 في حال مابتعرفوا الشخص الي عم ترسلوه أو الكنية في حال بتعرفوا لمين هي الرسالة (برفسور مثلا)
أو تعبير To whom it may concern ,

5- بتعرف عن نفسك , مهنتك , موقعك الحالي (شغلك الحالي) ,من أي بلد إنت بعدين بتذكر فورا من وين سمعت عن هاد البوزيشين وليش اخترت هي الجامعة أوهي الشركة بالذات 

6- وصلنا لأهم نقطة : ليش إنت بتتوقع حالك الأجدر بهاد البوزيشين وشو هي كفاءاتك وشو الي بيميزك عن غيرك ... هون بدك تدير بالك ما تبالغ وما تنقص من قيمتك 
 طبعا إذا عم تبعت لبوزيشين بأمريكا انفش حالك شوي مو مشكلي هني هيك بحبو بس إذا عم تبعت لألمانيا خليك ع الأرض وما تطير .. ما بحبوا المغرورين :)
الاعتدال ملك الموقف

7- ممكن كلمتين عن خططك المستقبلية بعد انتهاء المنحة أو وين بتشوف حالك بعد كم سنة بهاد الشغل بالشركة مثلا 

8- بالختام اتشكرهم لوقتهم بقراءة طلبك و اختم الرسالة ب
Best regards
 مع اسمك الكامل من دون ما تحط درجتك الأكاديمية و توقيعك بالأزرق حصرا .. الرسالة اطبعها على كمبيوتر بس التوقيع بالقلم الأزرق منشان تكون مقبولة 

9- وهي أهم خطوة بتتأكدوا من عدم وجود ولا نتوفة خطأ إملائي لإنه مصيبة بكل معنى الكلمة أو كارثة حتى ... اكتبوها على الوورد مع نظام تصحيح املائي وارجعوا خلوا حدن يقرأها إلكم ويعطيكم رأيه ويراقب إذا في أخطاء إملائية

لازم تكون الرسالة مقسمة لمقاطع , كل مقطع بيحكي عن فكرة وحدة بس , مابصير ترجع تعيد هالفكرة بغير مقطع ... هالشي كتير ضروري تركزوا عليه منشان ما يمل الي عم يقرأ رسالتكم 

بالأخير انظر لهلرسالة على إنها البوابة ليعرفوك من جوا وممكن هون تشرح شي من روحك .. ممكن تحكي عن وضعك بالحرب مو استدراجا للعواطف بس منشان تفرجيهم إنك شخص فعلا قوي وعم تناضل لمستقبلك وهالشي بحبوه الأجانب كتير بس مو بأكتر من سطر وبطريقة شوي رسمية

في مواقع بتنصحك بأول جملة تحكي عن حالك منشان تلفت نظر وتشد القارئ .. أنا بفضل التعريف عن الشخص وكإنك عم تدق الباب على بيت حدن وأول شي بتعمله إنك تعرف عن نفسك وبعدين تشرح ليش إنت دقيت الباب وليش هاد الباب بالذات وشو الخدمةالي جاي تعملها لصاحب البيت ... هيك بتخيل الموقف وعلى هالأساس كنت ارسل ايميلاتي و رسائلي للوظائف الي كنت قدم عليها و كانت تلقى إيجاب من الأغلبية